ரஜினி - ஒன் மேன் இண்டஸ்ட்ரி!

ரஜினி என்பவர் ஒரு தனிப்பட்ட நடிகர் இல்லை. அவரைச் சுற்றித்தான் இந்த திரையுலகமே இயங்குகிறது என்பதை மீண்டும் நிரூபித்திருக்கிறார், ஒரு சின்ன அறிவிப்பு மூலம்!

எந்திரன் – தி ரோபோ என்ற பெயரில் ஒரேயொரு அறிவிப்புதான் வெளிவந்திருக்கிறது இதுவரை. அதற்குள் ஒட்டுமொத்த திரையுலகமும் ஒரு புத்துணர்ச்சியோடு நிமிர்ந்து நிற்பதைப் பார்க்க முடிகிறது.

திட்டிய வாய்களெல்லாம் மீண்டும் ரஜினி புகழ்பாட தன்னைத் தயார்ப்படுத்திக் கொள்வதை நமுட்டுச்சிரிப்போடு வேடிக்கை பார்க்கத் தயாராகி விட்டனர் ரஜினி ரசிகர்கள்.

அய்ங்கரன் – ஈராஸ் நிறுவனங்கள் இந்தப் படத்தை இணைந்து தயாரிக்கின்றன. ஈராஸ் நிறுவனத்தின் பங்குகள் சர்வதேச பங்குச் சந்தையில் பட்டியலிடப்பட்டவை. அறிவிப்பு வெளியான கையோடு அதன் பங்கு மதிப்பு 2.5 சதவிகிதம் உயர்ந்திருக்கிறது.

இன்னொரு பக்கம் ஐங்கரன் நிறுவனத்துக்கு வாழ்த்துக்களும் வர்த்தக விசாரிப்புகளுமாக போன் கால்கள் வந்த வண்ணமுள்ளன.

ஆனால் குசேலனில் நடந்த எந்த தவறும் இந்தப் படத்தில் நடக்காமல் கவனமாக ஒவ்வொரு அடியாக எடுத்து வைக்கின்றனர் அய்ங்கரன் நிறுவனத்தினர்.

இந்தப் படம் வழக்கமான விநியோக முறையில் தரப்படாது என்றே தெரிகிறது. அய்ங்கரன் இந்தப் படத்தை உலகம் முழுக்க தானே வெளியிடப் போகிறது. அதுமட்டுமல்ல, இது வரை தமிழ்ப் படங்களே வெளியாக பல நாடுகளிலும் கால்பதிக்கப் போகிறது ரஜினியின் எந்திரன் - தி ரோபோ.

இதுகுறித்து அய்ங்கரன் தயாரிப்பாளர்களில் ஒருவரான அருண்பாண்டியன் இப்படிக் கூறுகிறார்:

“நீங்கள் சொல்வது சரிதான். ரஜினி தனி மனிதர் அல்லது தனிப்பட்ட நடிகர் கிடையாது. அவர் ஒன்மேன் இண்டஸ்ட்ரி... அதில் எந்த சந்தேகமும் வேண்டாம். ரோபோ இந்திய சினிமாவில் சரித்திரம் படைக்கப் போகும் படம். இதற்கு மேல் நான் எதுவும் சொல்லக் கூடாது. அவரது தீவிர ரசிகர்களில் ஒருவனாக பல ஆண்டுகள் அவரை ரசித்தவன், அவரது படங்களை விநியோகித்தவன் என்ற முறையில் சொல்கிறேன். ரஜினிக்கு ஈடு இணை கிடையாது...!”