புறம் பேசியவர்களிடமும் நட்பு பாராட்டும் ரஜினியின் பண்பு!

'இன்னா செய்தாரை ஒறுத்தல் அவர் நாண
நன்னயம் செய்து விடல்'

-இந்தக் குறள் யாருக்குப் பொருந்துகிறதோ இல்லையோ... ரஜினிக்கு நூறு சதவிகிதம் பொருந்தம்.

வள்ளுவப் பெருமானின் வாக்கை அப்படியே ஏற்று நடக்கும் உண்மையான தமிழ் மகன் இந்த ‘தங்க மகன்’!

ரஜினியைப் புகழ்ந்து பேசுபவர்களின் பட்டியலுக்கு இணையானது அவரைப் பற்றி புறம் பேசுபவர்களின் பட்டியல்.

காரணம்... பொறாமையைத் தவிர வேறு ஒன்றுமே இல்லை!

அட, அவர்களுக்கும் ரஜினிக்கும் சம்பந்தமே இருக்காது. ஆனால் ரஜினி என்னமோ அவர்களது ஜென்மப் பகைவர் மாதிரி நினைத்துக் கொண்டு வார்த்தைகளில் வன்மத்தைக் கொட்டுவார்கள்.

சத்யராஜூக்கும் ரஜினிக்கும் என்ன பகை? இத்தனைக்கும் சத்யராஜ் ஆரம்ப காலத்தில் வாய்ப்பின்றி சும்மா கிடந்த நேரத்தில் தனது படங்களில் முக்கிய வேடங்கள் கொடுத்து அவரை ஸ்டார் வில்லனாக்கியவர் ரஜினி. மூன்று முகத்தில் தொடங்கி மிஸ்டர் பாரத் வரை எத்தனை படங்கள்... எவ்வளவு வாய்ப்புகள். இதை சத்தியராஜே எத்தனை மேடைகளில் நெகிழ்ச்சியுடன் (அப்படி நடித்தபடி?!) சொல்லியிருப்பார்!

ஆனால் இதே சத்தியராஜூக்கு செக்குக்கும் சிவலிங்கத்துக்கும் வித்தியாசம் தெரியாமல் போய்விட்டது.

காவிரி மேடையில் தான் செய்த அநியாய பாவத்துக்கு, ஈழ மேடையில் கழுவாய் தேடிக் கொண்டார்.

இந்த மன்சூர் அலிகான்.... அவர் பேசிய நரகல் பேச்சுக்களை அச்சில் ஏற்ற முடியாது. ஆனால் அவர்தான் படையப்பாவில் ஒரு சின்ன ரோலில் வந்து பெரிய சம்பளத்துடன் போனார். இன்று ரஜினி புகழ் பாடிக் கொண்டிருக்கிறார்.

மனோரமா... ரஜினியின் இடத்தில் வேறு ஒரு நடிகர் இருந்திருந்தால், மனோரமா என்ற நடிகையை தமிழ் ரசிகர்கள் இந்நேரம் மறந்துவிட்டிருப்பார்கள். அடுத்த ஜென்மத்துக்கும் சேர்த்து பாவங்களைச் சேர்த்துக் கொண்டார் மனோரமா... அந்த ஒரே தேர்தலில்.

ஒரு வருடம்... சீண்ட ஆளில்லை. ஒரு வாய்ப்பும் கிடைக்கவில்லை இந்த மனோரமாவுக்கு. ஆனால் ஆண்டவன், இந்த ‘அருணாச்சலம்’ பக்கத்தில் இருப்பது, அருணாச்சலத்தில் வாய்ப்பு கிடைத்த போதுதான் அந்தம்மாவுக்கே தெரிந்தது!!

ரஜினி எப்போதும் ஈர உள்ளத்துக்குச் சொந்தக்காரர். ஏதோ முதுமையின் தாக்கத்தில் மனோரமா பேசியதாக நினைத்து மறந்து மன்னித்து, பிறர் படங்களிலும் வாய்ப்புகள் கிடைக்க ஏற்பாடு செய்தார். (அன்று எந்த ஜெயலலிதாவுக்காக ரஜினியை தாறுமாறாகப் பேசினாரோ, அதே ஜெயலலிதாவை சுத்தமாக மறந்து போனார் மனோரமா, தனக்கு கலைஞர் தலைமையில் நடந்த பாராட்டு விழாவின்போது!)

இப்போது வேலு பிரபாகரன்-

ரஜினியின் தீவிர எதிர்ப்பாளராக இருந்து இப்போது புகழ் பாடுபவராக மாறியுள்ள இயக்குநர்.
ரஜினி ஒரு நல்ல நடிகரே இல்லை என முழங்கியவர்தான் இவர். ஆனால் இன்று இப்படிச் சொல்கிறார்:

‘பகுத்தறிவு பிரச்சாரம் செய்த நான் வீடு இல்லாமல் நடுத் தெருவில் நின்றபோது, நண்பர் ரஜினிதான் உதவி செய்தார். சூப்பர் ஸ்டார் செய்த உதவி வாழ்நாளுக்கும் மறக்க முடியாதது...’ (நீங்க பேட்டி கொடுத்த அந்த பாவிகளுக்கு நன்கு உறைக்கும்படி சொல்லுங்கள்...பிரபாகரன்!)

இவரது முன்னாள் மனைவி ஜெயதேவி. இவரும் ரஜினியை இஷ்டத்துக்கும் விமர்சித்தவர்தான். ஆனால் அவருக்கும் சிவாஜியில் ஒரு வாய்ப்புக் கொடுத்து பெரிய தொகையை சம்பளமாகக் கொடுத்தார் ரஜினி. இத்தனைக்கும் தீட்டிய மரத்திலேயே கூர் பாரப்பது போல, அந்த சிவாஜி ஷூட்டிங்கிலேயே கூட தகராறு செய்தவர் இந்தப் பெண்.

உடனே ரஜினி இப்படிச் செய்ததற்கு ஆயிரம் தப்பர்த்தங்களை சிலர் கண்டுபிடிக்கக் கூடும்.

உங்களைக் கேவலமாகப் பேசிய ஒருவருக்கு உதவி செய்து பாருங்கள். குறைந்தது அப்படிச் செய்யலாம் என்ற எண்ணமாவது உங்களுக்கு வருகிறதா என்று யோசித்துப் பாருங்கள். அப்புறம் ரஜினியை விமர்சிக்கலாம்.

கஷ்டப்படுபவர் எதிரியா நண்பனா என்று பார்ப்பதில்லை ரஜினி... கஷ்டப்படுகிறாரா... சரி அவர்களுக்கு முதலில் கையைக் கொடுப்போம். மற்றதைப் பின்னால் பார்த்துக் கொள்வோம்... இதுதான் ரஜினி.

இந்த வரிசையில் இன்னும் எத்தனை எத்தனை நடிகர்கள், அரசியல் பிரமுகர்கள்... பாக்கியிருப்பவர் எத்தனை பேரோ உன்னிடம் தோற்பதற்கு... என இளையராஜா சுவாமிகள் (ரஜினி இப்படித்தான் கூப்பிடுவார்!) பாடியது ஒவ்வொரு நாளும் நிஜமாகி வருகிறது.

ஓசியில் ஒரு பிளாக் கிடைக்கிறதே என்று வக்கிரங்களை வாரியிறைக்கும் அசமஞ்சங்கள்தான் முக்கியமாக இதைக் கவனத்தில் கொள்ள வேண்டும்.

ஒரு காலத்தில் புரட்சித் தலைவர் எம்ஜிஆரைப் பற்றி வந்த விமர்சனங்களுக்கு அளவில்லை. நாய் பேயெல்லாம் ஒரு மைக் கிடைத்ததே என்று குரைத்துத் தீர்த்தன, இன்றைய 'சில பிளாக்கர்கள்' போல. அறிவு ஜீவிப் பத்திரிகைகள் அவரை ஒரு ஆட்சியாளராகவே பொருட்படுத்தவில்லை. எம்ஜிஆருக்கு பக்கபலமாக இருந்த தினத்தந்தி பேன்ற பத்திரிகைகளை இவர்கள் எள்ளி நகையாடியது கொஞ்சமல்ல... (அதே தினத்தந்தியில் வரும் செய்திக்கு இன்று கெஜட்டுக்கு சமமான அந்தஸ்து!)

ஆனால் இன்று- இதே அசட்டு அஞ்ஞானிகளும் அரைவேக்காடுகளும் போட்டி போட்டுக் கொண்டு புகழ்ந்து தள்ளுகின்றன. அவரைப் போல ஒரு ஆட்சியாளர் உண்டா... மனிதாபிமானி, பொற்கால ஆட்சி தந்த புரட்சித் தலைவர் என்று போற்றிப் புகழ்கின்றன.
எம்ஜிஆர் பெயர் சொல்லாமல் ஓட்டுக் கேட்கிற தைரியம் இன்றைய கட்சிகளில் யாருக்காவது உண்டா... (இன்னும் பல படிகள் மேலே போய் கருப்பு சிவப்பு பழுப்பு பெயிண்ட் அடித்துக் கொள்கிறார்கள் தங்கள் முகங்களுக்கு!)

அன்றைக்கு செய்தது போல எம்ஜிஆருக்கு எதிராக எதையாவது பேசி ஓட்டுக் கேட்டுப் பார்க்கட்டும் இவர்கள் – திமுக உள்பட- டப்பா டான்ஸாடி விடும்!

ஏனென்றால், மகாபாரதம் சொல்வது போல ‘நல்லவர்களுக்கு காலமே தலை வணங்கும்... காலத்தின் கையிலிருக்கும் சாதாரண மனிதர்கள் எம்மாத்திரம்’!
http://www.envazhi.com

எம்ஜிஆருக்குப் பின் ரஜினிதான்! - மதன்

75 ஆண்டு கால தமிழ் சினிமா வரலாற்றில் சிறந்த பொழுதுபோக்குப் படங்களைத் தருவதிலும், குழந்தைகளையும் கவரும் தனித் தன்மையிலும் அமரர் எம்ஜிஆருக்குப் பின் சிறந்து விளங்குபவர் ரஜினி மட்டும்தான் என்கிறார் கார்ட்டூனிஸ்ட் மதன்.

மதனின் ஒவ்வொரு கோடுகளுக்கும் தனி அர்த்தம் இருப்பதைப் போலவே, ஒவ்வொரு வார்த்தைக்கும் பல அர்த்தங்கள் உண்டு. ரஜினி என்ற மாபெரும் கலைருக்குள் உள்ள கலை, அரசியல், மனிதாபிமானம் பற்றி, இன்றைய பத்திரிகையாளர்களில் அதிகம் தெரிந்தவர் மதன்.

அது மட்டுமல்ல, பெரும்பாலான எழுத்தாளர்கள் தங்கள் தலைக்குப் பின்னால் ஏதோ ஒரு ஒளிவட்டம் சுழல்வதாக தலைக் கனத்துடன் பேசித் திரியும் இன்றைய சூழலில் எதையும் வெளிப்படையாகப் பேசுபவர் மதன். ஒரு நல்ல ரசிகர், நல்ல எழுத்தாளரால்தான் இப்படி மனம் திறந்து பாராட்ட முடியும் என்பதால் இதைக் குறிப்பிடுகிறேன். (அவரது முகாம், அவர் வளர்ந்த பின்னணி குறித்தெல்லாம் நாம் கவலைப்படத் தேவையில்லை.)

ரஜினி பேரக் கேட்டாலே... எனும் தலைப்பில் தமிழில் டாக்டர் காயத்ரி எழுதிய சூப்பர் ஸ்டார் ரஜினியின் வாழ்க்கை வரலாற்றுப் புத்தகம் நேற்று மாலை சவேரா ஓட்டலில் வெளியிடப்பட்டது.

கவிஞரும் திமுக எம்பியுமான கனிமொழி கருணாநிதி முதல் பிரதியை வெளியிட, எழுத்தாளரும் கார்ட்டூனிஸ்டுமான மதன் மற்றும் இயக்குநர் எஸ்பி முத்துராமன் ஆகியோர் பெற்றுக் கொண்டனர்.

இந்த விழாவின் சிறப்பம்சம் மதன் மற்றும் எஸ்பி முத்துராமனின் சிறப்பான பேச்சுதான். ரஜினியைப் பற்றி எந்தவித அலங்காரங்களும் இல்லாத அவர்கள் பேச்சு உண்மையிலேயே நிறைவாய் இருந்தது. மற்றபடி இந்த விழாவில் சில நெருடல்களும் உண்டு. அதை பின்னர் பார்க்கலாம்!

மதன் பேச்சிலிருந்து...
நடிகரின் வாழ்க்கை வரலாறு என்றதுமே சிலர் ஆஹா என்பார்கள். இன்னும் சிலர் ஓ என்ற சின்ன பார்வையுடன் நகர்ந்து விடுவார்கள். எழுதுபவருக்குப் புகழ் கிடைத்தாலும், அவர் எழுத்துக்கு பெரும்பாலும் அங்கீகாரம் கிடைக்காது.

இதற்குக் காரணம் ஒரு நடிகரின் வாழ்க்கை வரலாற்றை எழுதுவதில் உள்ள சிக்கல்கள். அதாவது ரெண்டுவித சிக்கல்கள் இருக்கு. பெரும்பாலும் ஏதாவது ஒரு சினிமா பத்திரிகை நிருபர் தனி வேலையாக அதை எடுத்துக் கொண்டு எழுதுவார். அதில் பெரும்பாலும் உண்மைகள் விடுபட்டு, வெறும் புகழ்ச்சிதான் மேலோங்கியிருக்கும். ஒரு தலைவரின் வாழ்க்கை வரலாற்றை அவரது தொண்டர்கள் யாரேனும் எழுதினாலும் இந்த நிலைதான்.

இன்னொன்று பிரபல எழுத்தாளர்கள் எழுத முன்வருவதில்லை. அப்படியே எழுதினாலும் அதில் விமர்சனம் நிறைந்திருக்கும். இந்த இரண்டுக்கும் இடைப்பட்ட நடுநிலைப் போக்கில் எழுதப்படும் வாழ்க்கை வரலாறுகள்தான், நல்ல பதிவுகளாக அமையும்.

இந்தப் புத்தகம் அப்படிப்பட்டதுதான். நன்றாக எழுதியிருக்கிறார் காயத்ரி. ரஜினியின் வயதுக்கேற்ப அந்தஸ்து அதில் தரப்பட்டிருக்கிறது. உதாரணத்துக்கு அவரது சிறுவயது பருவ நிகழ்வுகளில் சிறுவன் ரஜினிதான். அதில் சிறப்பு மரியாதை கிடையாது. சூப்பர் ஸ்டாராக வந்த பிறகு அதற்குரிய மரியாதையோடு விளித்து எழுதியிருப்பது இந்த நூலுக்கு தனி நம்பகத் தன்மையைத் தருகிறது.

ரஜினியைப் பற்றி நிறைய சொல்லலாம். அவரை நான்கு முறை சிறப்பு நேர்காணல் செய்த பெருமை எனக்குண்டு. ஆனால் அதைப் பற்றி பேசும் மேடை இதுவல்ல.

தமிழ் சினிமாவில் தியாகராஜ பாகவதர் காலத்துப் பாடல்களை இன்றும் கூட கேட்டு ரசிக்கலாம். அதற்குப் பிறகு எம்ஜிஆர்தான் மிகச் சிறந்த பொழுதுபோக்குப் படங்களைத் தந்தார். இப்போது பார்த்தாலும் அவரது படங்கள் மிகச்சிறந்த பொழுதுபோக்காக அமைந்துள்ளன. அவருக்குப் பிறகு அந்த மேஜிக் கைவரப் பெற்றவர் சூப்பர் ஸ்டார் ரஜினிதான். மிகச் சிறந்த நடிகர் மட்டுமல்ல. அதையும் தாண்டிய பல பரிமாணங்கள் ரஜினி அவர்களுக்கு உண்டு.

வெளிநாடுகளிலும் ஒரு நடிகரைப் பற்றி பல புத்தகங்கள் வருகி்ன்றன. ஆனால் இங்கே அப்படி இல்லை. ரஜினியைப் பற்றி எப்போதோ இந்த மாதிரி புத்தகங்கள் வந்திருக்க வேண்டும். டாக்டர் காயத்ரி போன்றவர்கள் ரஜினியைப் பற்றி இன்னும் பல கோணங்களில் புத்தகங்கள் எழுதலாம். ஒரு ஞாயிற்றுக் கிழமையை இதற்காக ஒதுக்கி ரஜினியுடன் சில மணிநேரங்கள் உரையாடி, அதையே புத்தகமாகவும் கொண்டுவரலாம்.

அப்படிச் செய்யும்போது, ரஜினியைப் பற்றியும், அவரது எண்ணங்கள் பற்றியும், மக்களின் ரசனை குறித்தும் மக்களுக்குத் தெரியவரும், என்றார்.

- வினோஜாஸன்
http://www.envazhi.com

ரஜினியின் இடம் அப்படியே இருக்கிறது! - ஆர்.எம்.வீரப்பன்

சில தினங்களுக்கு முன்புதான் முன்னாள் அமைச்சரும் ரஜினியின் நலம் விரும்பிகளுள் ஒருவருமான சு.திருநாவுக்கரசர் எம்பி, ரஜினியின் அரசியல் பிரவேச அவசியம் குறித்து வெளியிட்ட கருத்துக்களைத் தெரிவித்திருந்தோம். அதன் பிறகுதான் அவர் பத்திரிகைகளுக்கு பேட்டியளித்தார் என்பது குறிப்பிடத்தக்கது.

அடுத்த நமது மதிப்புக்குரிய முன்னாள் அமைச்சரும், எம்ஜிஆர் கழகத் தலைவருமான ஆர்எம் வீரப்பன்.

ரஜினியின் அரசியல் பிரவேசத்துக்கு முதல் கட்டியம் கூறியவர் ஆர்எம்வீதான். பாட்ஷா படத்தின் வெள்ளி விழாவையும் அதில் ரஜினி நிகழ்த்திய புயல் வேக உரையையும், அதனால் எழுந்த அரசியல் பூகம்பங்களையும் மறுபடியும் ஒருமுறை இங்கே நினைவு கூற வேண்டியிருக்காது என நம்புகிறேன்.

ரஜினிக்காக மந்திரி பதவியையே துறந்தவர், ரஜினி கட்சி ஆரம்பித்தால் எதையும் செய்யத் தயாராக இருந்தவர் என அமரர் மூப்பனார் அவர்களால் வர்ணிக்கப்பட்டவர் ஆர்எம்வீ.
இன்று ‘காலத்தின் கட்டாயம்’ அவரை இன்னொரு அணிக்குள் நிற்க வைத்திருந்தாலும் (அந்த ஏற்பாட்டைச் செய்தவரும் ரஜினிதான்!), இந்த நிமிடமே ரஜினி பொது வாழ்க்கை குறித்த சாதக அறிவிப்பை வெளியிட்டால் தயங்காமல் முதல் ஆதரவுக் குரல் தரத் தயாராக இருப்பவர்.

அவரிடம் எவ்வளவோ விஷயங்கள் பற்றி பேசினேன்.

அதில் அவர் ரஜினியைப் பற்றி, அவரது அரசியல் பிரவேசம் குறித்து கூறியதில் ஒரு பகுதியை மட்டும் தருகிறேன்.

இனி ஆர்எம்வீ:

நல்லவர்கள் எல்லோரும் ஒருமித்த குரலில் ஒரு நல்லவரை அரசியலுக்கு வருமாறு வேண்டிக் கொண்டோம். புரட்சித் தலைவருக்குப் பிறகு அப்படியொரு வாய்ப்பு ரஜினிக்கு மட்டுமே அமைந்தது.

இது யாராலும் உருவாக்கப்பட்டதல்ல... நான் முன்பே சொன்ன மாதிரி, காலத்தின் கட்டாயத்தில் அந்த வாய்ப்பு அவருக்கு தானாகவே அமைந்துவிட்டது. அதை அவர் மறுதலித்ததும் அதன் பின் வந்த நிகழ்வுகளும் வரலாறு.

அந்த முடிவு குறித்து நான் எதுவும் சொல்லமாட்டேன். அது அவரது சொந்த முடிவு.
ஆனால் இன்றைக்கு பத்திரிகைகளில் பரபரப்பாக பல விஷயங்களை எழுதுகிறார்கள். அதைப் படிக்கும்போது எனக்குள் பழைய வரலாறு சற்றே எட்டிப் பார்த்தது.

இப்போது ரஜினி அரசியலுக்கு வருவது சாத்தியமா?

இது ஜனநாயக நாடு. அவர் அரசியலுக்கு வருவதை யார் தடுக்கப் போகிறார்கள்... ஆனால் முதலில் அதற்கு அவர் தயாராக இருக்கிறாரா எனத் தெரியவேண்டும்.

யூகங்களுக்கு பதில் சொல்வது சரியாக இருக்காது. இருந்தாலும் உங்களைப் போன்ற அபிமானிகள் வருந்திக் கேட்பதால் சொல்கிறேன்... அரசியலில் ரஜினியின் இடம் அப்படியே இருப்பதாகத்தான் நம்புகிறேன்.

காரணம் மக்கள் மனதில் அவர் மீதான மரியாதை கொஞ்சமும் குறைந்ததாகத் தெரியவில்லை. தாங்கள் எதிர்பார்த்த மாதிரி அவர் அரசியலுக்கு வரவில்லையே என்ற கோபத்தில் சிலர் அவரை விமர்சிக்கக் கூடும். ஆனால் நல்லவர்களின் புகழ் நீண்டகாலம் நிலைத்திருக்கும், புரட்சித் தலைவரைப் போல...

-நிறைய பேசினாலும் அதில் அளவோடு எடுத்துக் கையாளுமாறு கேட்டுக் கொண்டார் ஆர்எம்வீ. அரசியல் சாணக்கியராயிற்றே!

குறிப்பு: ரஜினி ஆதரவாளர்களிடம் கருத்துக் கேட்டால் இப்படித்தானே சொல்வார்கள் என நண்பர் ஒருவர் கருத்து தெரிவித்திருந்தார். ஒரு காரியத்தில் இறங்குகிறோம்... அதற்கு நாம் யாரைக் கைத்துணைக்கு அழைப்போம்... நம்மை விமரிசிப்பவர்களையா... நலம் விரும்பிகளையா?

பல நேரங்களில் விமரிசனம் எனும் பெயரில் வரும் வக்கிரக் கணைகள் நல்ல முயற்சிகளைத் துவண்டு போகச் செய்துவிடும்.

ரஜினி அடிக்கடி சொல்வதுபோல, ஒரு நல்ல விஷயத்தைச் செய்யும்போது நமக்கு வேண்டியவர்களையெல்லாம் துணைக்கு அழைத்துக் கொள்ளவேண்டும். அந்த செயலின் முடிவில் கிடைக்கும் வெற்றியை தனக்கும் சிறிது வைத்துக் கொண்டு மீதியை துணை நின்ற அனைவருக்கும் பகிர்ந்து அளிக்க வேண்டும். என்ன சரிதானே!
http://www.envazhi.com

விஜய்காந்த் ஜெயிச்சா... நாடு தாங்காதுண்ணே...! – இது வடிவேலு வெடி!!

ஒரு இடத்தில் ஜெயித்ததற்கே இந்த ஆளு (விஜயகாந்த்) இந்த பாடுபடுத்துறாரே... நாளைக்கு பத்து இடத்தில் ஜெயிச்சிட்டா இந்த நாடு என்னாகுமோன்னு பயமா இருக்குண்ணே... அவருக்கு மட்டும்தானா மக்கள் செல்வாக்கு... எனக்கும்தாண்ணே இருக்கு. நான் நின்னா ஓட்டுப்போட மாட்டாங்களா நம்ம மக்கள்... இப்ப சொல்றண்ணே... அவர் எந்தத் தொகுதியில் போட்டியிட்டாலும் நான் அவரை எதிர்த்துப் போட்டியிடுவேன். நானா, விஜயகாந்த்தா பார்த்துடுவோம்ணே...

-விஜய்காந்த் தொண்டர்களின் வன்முறைத் தாக்குதலில் பாதிக்கப்பட்ட வடிவேலு அளித்த பேட்டியின் ஒரு பகுதி இது.

நடிகர் வடிவேலுவுக்கும், விஜயகாந்த்துக்கும் இடையே கடந்த சில வருடங்களாகவே கருத்து வேறுபாடுகளும், அதுதொடர்பான மோதல்களும் இருந்து வருவது தெரியும்தானே...

சில மாதங்களுக்கு முன்பு விஜயகாந்த் வீட்டுக்கு வந்தவர்கள், வடிவேலு அலுவலகம் காரை நிறுத்தியது தொடர்பாக இரு தரப்பினருக்கும் இடையே கடும மோதல் ஏற்பட்டு, அதில் வடிவேலு கடுமையாக தாக்கப்பட்டார்.

இதுதொடர்பாக போலீஸில் விஜயகாந்த் மேலாளர் உள்ளிட்டோர் மீது வழக்குப் பதிவு செய்யப்பட்டது. இதுதொடர்பான வழக்கு சைதாப்பேட்டை கோர்ட்டில் நிலுவையில் உள்ளது. இந்த வழக்கில் இன்று வடிவேலு சாட்சியம் அளிக்கவுள்ளார்.

இந்த நிலையில் நேற்று காலை 50-க்கும் மேற்பட்டோர் 20-க்கும் மேற்பட்ட பைக்குகள், ஆட்டோக்களில் சாலிகிராமத்தில் உள்ள வடிவேலு வீட்டுக்கு வந்தனர்.

பின்னர் வடிவேலு வீட்டின் மீது கொலை வெறித்தாக்குதலை மேற்கொண்டனர். வீடு மற்றும் அலுவலகம் மீது சரமாரியாக பெரிய பெரிய கற்களை வீசி அடித்ததில் வீட்டின் கண்ணாடி ஜன்னல்கள், வீட்டின் வரவேற்பரையில் இருந்த ஷோகேஸ் ஆகியவை உடைந்து சிதறின.

வீட்டுக்குள் இருந்தவர்கள் மீதும் கற்கள் விழுந்ததில் வடிவேலு வீட்டினரில் ஒருவர் காயமடைந்ததாக தெரிகிறது. அதிர்ஷ்டவசமாக வடிவேலு உள்ளிட்டோர் உயிர் தப்பினர்.

இந்த கொலை வெறித் தாக்குலைப் பார்த்து அந்த தெருவே பரபரப்பாகியது. அனைவரும் தெருவில் கூடிவிட்டனர். சிறிது நேர தாக்குதலுக்குப் பின்னர் அந்த கும்பல் வந்த வண்டிகளில் திரும்பி விட்டது.

போலீஸாருக்குத் தகவல் போய் அவர்கள் விரைந்து வந்தனர்.

'எந்தக் கோட்டையைப் பிடிக்கப் போகிறார்?'

நடந்த சம்பவம் குறித்து வடிவேலு இப்படிக் கூறுகிறார்:

20க்கும் மேற்பட்ட மோட்டார் சைக்கிள்களில் வந்தனர். வந்தவுடன் கற்களை எடுத்து வீட்டின் மீதும், அலுவலகம் மீதும் சரமாரியாக வீசினர். தொடர்ந்து வீசிக் கொண்டே இருந்தனர். பக்கத்து வீடுகளிலும் போய் கற்கள் விழுந்தன.

என் தலைவனை எதிர்த்து விட்டு வாழ்ந்து விடுவாயா என்று கோபத்துடன் கூறியபடி கற்களால் தாக்கினர்.

நான் ஒரு நகைச்சுவை நடிகன். என்னை தாக்கி விட்டு எந்தக் கோட்டையை இவர் பிடிக்கப் போகிறார் என்று தெரியவில்லை. என்னை அடித்துதான் இவர் கோட்டையைப் பிடிக்க வேண்டுமா? அந்த அளவு வீக்கான பார்ட்டியா இவரு...

ஒரு இடத்தில்தான் ஜெயித்திருக்கிறார். அதற்கே இப்படியா? என்னை எதற்காக குறி வைக்கிறார் என்று தெரியவில்லை. கடந்த ஒரு வருடமாகவே என்னை தாக்கி வருகிறார்கள். பலமுறை கொலை மிரட்டல்கள் விடுத்துள்ளனர். இதையெல்லாம் நான் வெளியில் சொல்லாமல் இருக்கிறேன்.

ஒரே எதிரி... அது விஜய்காந்த்தான்!

நான் காமெடி நடிகன். ரவுடி அல்ல. ஜனங்களை சிரிக்க வைப்பது மட்டுமே எனது தொழில். ஜனங்கள்தான் எனது கடவுள். கல் வீசியவர்களுக்கும், அதைத் தூண்டியவர்களுக்கும் மக்கள் சரியான பாடம் கற்றுக் கொடுப்பார்கள்.

எனக்கு இந்த உலகிலேயே ஒரேயொரு எதிரிதான் இருக்கிறார். வேறு யாரும் எனக்கு எதிரிகள் இல்லை. அஜீத் படத்தை வைத்திருந்தார்கள் என்று கூறுகிறார்கள். அது திசை திருப்பும் செயல்.

நானா, விஜயகாந்த்தா பார்த்து விடுவோம்ணே!

விஜயகாந்த்தான் என்னைக் கொலை செய்ய ஆளை அனுப்பியுள்ளார். கடந்த ஒரு வருடமாகவே இதை அவர் செய்து கொண்டிருக்கிறார்.

மக்கள் செல்வாக்கு என்று நீ கூறுவாயானால் எனக்கும்தான் மக்கள் செல்வாக்கு இருக்கிறது. அடுத்த தேர்தலில் நீ எங்கே வேண்டுமானாலும் போட்டியிடு. நான் உன்னை எதிர்த்துப் போட்டியிடுகிறேன். மக்கள் செல்வாக்கு எனக்கா, விஜயகாந்த்துக்கா என்று பார்த்து விடுவோம்ணே...

நீ ஒரு கட்சியின் சார்பில் போட்டியிடுகிறாய். நான் சுயேச்சையாக போட்டியிடுகிறேன். அத்தனை கட்சிகளின் ஆதரவுடனும் உன்னை எதிர்த்துப் போட்டியிடுவேன். பார்த்து விடலாம்.

எம்ஜிஆர் பேரச் சொல்லக்கூட தகுதியில்ல!

என்னை ஆள் வைத்து அடிச்சீல்ல, உனக்கு எந்தத் தகுதியும் இல்லை. நான் உன்னை எதிர்த்துப் போட்டியிடுகிறேன். அதில் நீ ஜெயித்து விட்டால் இந்த தமிழ் சினிமாவை விட்டே விலகி விடுகிறேன்.

ஒரு இடத்தில் ஜெயிச்சதுக்கே இந்தாளு இந்த பாடு படுத்துறாரே..., நாளைக்கு பத்து இடத்தில் ஜெயிச்சுட்டா இந்த நாடு என்னாகுமோன்னு பயமா இருக்குண்ணே...

இந்த லட்சணத்துல இந்தாளு எம்ஜிஆர் பெயரையெல்லாம் எந்த தகுதில உபயோகப்படுத்துறார்னே தெரியலயே...உண்மையில அந்த புரட்சித் தலைவரோட பெயரைச் சொல்லக்கூட இந்தாளுக்குத் தகுதியில்ல!!”

சல்யூட்டும் அடிக்கணும் சவுக்காலும் அடிக்கணும்!

சர்க்கரையாய் இனிக்காதே... உன்னைக் கரைத்துக் காணாமலடித்து விடுவார்கள், என்ற பழமொழியை மீண்டும் ஒருமுறை இங்கே கூற விரும்புகிறேன்.

மீடியாக்காரர்களை ரொம்பக் கொஞ்சினால் முகத்தை நக்க வருவார்கள். ரொம்பவும் தூர வைத்தால், ரஜினியை கடித்துக் குதறுவது போலவும் செய்வார்கள். இவர்களுக்கு அவ்வப்போது கேஸ் போட்டு வாலை ஒட்ட நறுக்கி வைக்கும் அல்லது மானத்தை வாங்கும் ஜெயலலிதா, கருணாநிதிகள்தான் லாயக்கு.

இதோ மீண்டும் ஒருமுறை தன்னைப் பற்றி தாறுமாறாக எழுதிய ஆவி, ஜீவி, ரிப்போர்ட்டர் போன்ற பத்திரிகைகள் மீது அவதூறு வழக்குத் தொடர்ந்துள்ளார் ஜெயலலிதா. அதுமட்டுமல்ல... உடனே மன்னிப்பு கேளுங்கள்... இல்லாவிட்டால் கொடுங்கள் ரூ.10 கோடி நஷ்ட ஈடு என்றும் சூடு கொடுத்துள்ளார்.

இது குறித்து அவர் தனது வழக்கறிஞர் நவநீத கிருஷ்ணன் மூலம் நக்கீரன், ஜூவி, ரிப்போர்ட்டர் பத்திரிகைகளுக்கு அனுப்பியுள்ள நோட்டீஸ் இதோ...

கட்சியின் பொதுச் செயலாளர் நான்தான்; போடுங்கள் கையெழுத்து என்று சசிகலா கூறியதாக சசிகலா அரங்கேற்றிய பவர்கட் பிளான் என்ற தலைப்பில் செய்தி வெளியாகியுள்ளது.

இந்த செய்தி எனது புகழுக்கு களங்கம் விளைவிக்கும் வகையில் திட்டமிட்டு விஷமத்தனத்துடன் உண்மைக்கு புறம்பாக புனையப்பட்ட தகவல்களைக் கொண்டு வெளியிடப்பட்டுள்ளது.

எனது அரசியல் எதிரியான கருணாநிதி உத்தரவுபடியே அந்த செய்தி வெளியிடப்படடுள்ளது. இந்த பொய்யான தகவல்களை வெளியிட்ட பத்திரிகை நிபந்தனையற்ற மன்னிப்பு கேட்பதுடன், அது தொடர்பான விளக்கத்தை வெளியிட வேண்டும்.

மன்னிப்பு கேட்காவிட்டால் ரூ.10 கோடி வழங்கக் கோரி மான நஷ்ட வழக்கு தொடரப்படும். பத்திரிகை கவுன்சிலிலும் புகார் செய்யப்படும்.

இவ்வாறு அந்த நோட்டீசில் கூறப்பட்டுள்ளது.

மீடியா: ரஜினியும் ஜெயலலிதாவும்!

எம்ஜிஆர் மறைவுக்குப் பிறகு தான் திமுகவில் சேர முயன்று கருணாநிதிக்குத் தூது அனுப்பியதாக ஒரு பத்திரிகை எழுதியுள்ள கட்டுரைக்கு எதிராகவும் இதே போன்ற நோட்டீசை அனுப்பியுள்ளார் ஜெயலலிதா.

ஜெயலலிதாவுக்குத் தெரியும், இந்தப் பத்திரிகைகளால் தனக்கு ஆகப்போவது ஒன்றுமில்லை என்பது. காரணம் 1996-லிருந்து ஜெயலலிதாவுக்கு எதிராக கடுமையாக நிலையை எடுத்து வருபவர்கள் இவர்கள்.
இனி ஒழிந்தார் ஜெயலலிதா என்ற இவர்களின் பிரச்சாரத்தைத் தாண்டி 2001-ல் அதிகாரத்துக்கு வந்தார். அதனால் இவர்களின் லட்சணம் என்ன, வாக்காளர்கள் மீது இவர்களை எந்த அளவு நம்புகிறார்கள் என்பதெல்லாம் அவருக்குப் புரிந்திருக்கிறது. அதனால்தான் தைரியமாக அடித்து நொறுக்குகிறார்.

அதற்காக நாம் ஜெயலலிதாவை ஆதரிக்கவில்லை. ஆனால் மீடியாவை அவர் அணுகும் விதம்தான் ஓரளவு சரியானது என்றே தோன்றுகிறது.

ரஜினி ரசிகர்கள், அனுதாபிகள், ஆதரவாளர்கள் இதிலிருந்து தெரிந்து கொள்ள வேண்டியது இது ஒன்றுதான்.

மீடியா விஷயத்தில் ரஜினி ஜெயலலிதாவை விட மிக மேம்பட்ட அணுகுமுறையக் கையாளுகிறார். அதாவது தன்னை விமர்சிக்கும் மீடியாவை ஒரு பொருட்டாகவே மதிக்காத ஒரு அணுகுமுறை அது.

ஆனால் அவரது கண்ணியத்தைப் புரிந்து கொண்டு மதிக்கும் அளவுக்கு இங்குள்ள மீடியாவுக்கு ஞானமும் இல்லை, இவர்களிடம் அப்படிப்பட்ட ஞானிகளும் இல்லை.

அதனால்தான் ரஜினி கேட்காத மன்னிப்பைக் கேட்டுவிட்டதாக தலைப்புச் செய்தியாக பிரஸ்தாபித்தார்கள்.

இனி ரஜினி 'ஆபீஸ் ரூம்' போட்டால்தான் அடங்குவார்களோ!

(மீடியாக்களுக்குத்தான் மக்களிடம் செல்வாக்கில்லையே... அப்படியெனில் குசேலன் பாதிக்கப்பட்டதாக எப்படிக் கூறுவீர்கள் என சிலர் கேட்கக் கூடும். சினிமா வேறு, அரசியல் வேறு. இதற்கு ஒரு தனிப் பதிவைத் தரும் திட்டமுள்ளது.)