300 பக்கங்களை ஒரே மூச்சில் படித்த எந்திரன்!

விஞ்ஞானியான ரஜினி, தன் அரிய கண்டுபிடிப்பால் எந்திரனை உருவாக்குகிறார். அந்த எந்திரன் தோற்றத்தில் இன்னொரு ரஜினியாக இருக்கிறது. மொழியைப் படிக்கவும், பேசவும் மற்ற மனிதர்களைப் போலவே இயங்கக்கூடிய விதத்தில் பார்வைக்கு மனிதனைப் போலவே தோற்றமளித்தாலும் அந்த எந்திரனுக்குள், கம்ப்யூட்டர் மூளை செயல்படுவதால்... மனித சக்திக்கு அப்பாற்பட்ட அரிய சக்திகள் பலவும் எந்திரனுக்கு இருக்கின்றன.

எந்திரனின் தோற்றம் மற்ற மனிதர்களுடன் ஒத்திருக்கிறதா, இல்லையா என்பதை சோதித்துப் பார்க்க விரும்பும் விஞ்ஞானி, அதைக் கூட்டிக் கொண்டு தான் வழக்கமாக முடி திருத்திக் கொள்ளும் சலூனுக்குப் போகிறார்.

உள்ளே போனதும், அங்கிருக்கும் முடி திருத்தும் கலைஞர்கள் எல்லோரும் ரஜினியுடன் இன்னொரு ரஜினியும் வருவதாப் பார்த்து அதிசயப்படுகிறார்கள். அதில் ஒருவர் விஞ்ஞானி ரஜினியிடம், ‘யார் இவர்... உங்களைப் போலவே இருக்காரே?’ என்று கேட்க, அதற்கு, இவர் என்கூட பிறந்தவர்...!” என்கிறார் விஞ்ஞானி ரஜினி.

கூடப் பிறந்தவன்னா, ‘இதுவரைக்கும் இவரை இங்கு கூட்டிக்கிட்டே வந்ததில்லையே...!” என்று பதிலுக்கு அவர் கேட்க, “இவர் நேத்துதானே பிறந்தார்...!!” என்று ரஜினி பதில் சொல்லி, பிறகு சமாளிக்கிறாராம்.

சலூனில், உட்கார்ந்து கொண்டிருக்கும் வேளையில், எந்திரன் ரஜினி படிக்க புத்தகம் கேட்க, அவரிடம் கொடுக்கப்படும் புத்தகங்கள் அத்தனையையும் உடனுக்குடன் படித்துக் கொடுத்துவிட்டு, வேறு புத்தகம் கேட்பாராம் எந்திரன் ரஜினி.

இந்த தொல்லை தாங்காத சலூன்காரர், 300 பக்கங்களுக்கு மேல் உள்ள ஒரு புத்தகத்தைக் கொடுக்க, அதையும் சில நிமிடங்களில் மண்டையில் ஏற்றிக் கொள்வாராம் எந்திரன்.

எதையும் படிக்காமல், சும்மா ஒப்புக்குத்தான் அவர் விளையாடுகிறார் என்று நினைத்த சலூன்காரர், எந்திரனிடம், அந்தப் புத்தகத்தில் அவர் படித்ததைப் பற்றிய கேள்விகளைக் கேட்க, இன்ன புத்தக்த்தில் இத்தனாம் பக்கத்தில் இந்த விஷயம் எழுதப்பட்டிருக்கிறது என்று, இதுவரை படித்ததையெல்லாம் எந்திரன் புட்டுப்புட்டு வைக்க, அதிர்ச்சியில் மயக்கம் போடாத குறையாக அங்கிருந்து விரைகிறாராம் சலூன்காரர்... நடப்பதையெல்லாம் வேடிக்கைப் பார்த்தபடி சிரித்துக் கொண்டிருப்பார் இது அத்தனைக்கும் காரணகர்த்தாவான விஞ்ஞானி ரஜினி.

-இது எந்திரனில் இடம்பெறும் ஒரு காட்சி.

இதை நாம் லீக் செய்யவில்லை. எந்திரன் தயாரிப்பாளர்களே வெளியிட்டிருக்கும் காட்சி மற்றும் படங்கள் இவை. வெளிவந்த இதழ் குங்குமம்!!

அதைவிடுங்க...

இந்தக் காட்சியை ரஜினி எப்படிச் செய்திருப்பார்... அதுவும் இரண்டு ரஜினிகளும் ஒரே காட்சியில் தோன்றுவது நிஜமாகவே சுவாரஸ்யமான காட்சியமைப்புதான்.

ஒரு சாம்பிளுக்கே இப்படியென்றால்... இன்னும் படம் பற்றிக் கேட்க வேண்டுமா...!

எந்திரன் இனி 'சன்' வசம்!

கைமாறியது ரஜினியின் எந்திரன்: சன் பிக்சர்ஸ் தயாரிக்கிறது!

இது அதிகாரப்பூர்வமான செய்தி...

சூப்பர் ஸ்டார் ரஜினி நடிக்கும் இந்திய சினிமாவின் பிரமாண்ட படைப்பான எந்திரன் – தி ரோபோவை அய்ங்கரன் நிறுவனத்திடமிருந்து மொத்தமாக பெரும் விலைக்கு வாங்கியுள்ளது சன் டிவியின், சன் பிக்சர்ஸ்.

இன்று மாலை சன் நிறுவனத் தலைவர் கலாநிதி மாறனை அவரது இல்லத்தில் சூப்பர் ஸ்டார் ரஜினி, இயக்குநர் ஷங்கர் மற்றும் கேமராமேன் ரத்னவேலு ஆகியோர் சந்திக்கின்றனர்.

ஷங்கர் இயக்கும் எந்திரன் படத்தை அய்ங்கரன் நிறுவனம் 150 கோடி ரூபாய் பொருட் செலவில் தயாரிக்க திட்டமிட்டது.

இதில் சூப்பர் ஸ்டார் ரஜினிகாந்த் இரு வேடங்களில் நடிக்கிறார். நாயகியாக ஐஸ்வர்யா ராய், ரூ.6 கோடிக்கு ஒப்பந்தம் செய்யப்பட்டார்.

பெரு நாட்டில் உள்ள உலக அதிசயமான மாச்சு பிக்குவில் இரு மாதங்களுக்கு முன் படப்பிடிப்பு துவங்கியது. கிட்டத்தட்ட 30 சதவிகித படப்பிடிப்பு முடிந்துவிட்ட நிலையில், அய்ங்கரன் நிறுவனமும், அதன் பங்குதாரரான ஈராஸ் இன்டர்நேஷனலும் நிதி நெருக்கடியில் சிக்கித் தவித்தன. சர்வதேச நிதி நெருக்கடி காரணமாக, ஈராஸ் இந்தப் படத்திலிருந்து சில வாரங்களுக்கு முன் விலகிக் கொண்டது.

இதனால் அய்ங்கரன் அடுத்த கட்ட நடவடிக்கைகளில் இறங்கியது.
இந்நிலையில், இந்த மாபெரும் படத்தைத் தயாரிக்க விருப்பம் தெரிவித்தது கலாநிதி மாறனின் சன் பிக்சர்ஸ்.

பெரும் தொகைக்கு படத்தை வாங்கியுள்ள சன் பிக்சர்ஸ், இந்தப் படத்தை இந்தியாவின் மிகப் பிரமாண்ட படமாக்க உறுதி பூண்டுள்ளது.

- நன்றி: தட்ஸ்தமிழ்

என் இனிய இயந்திரா!

எழுத்தாளர்களில் சூப்பர் ஸ்டார் யாரென்றால், சந்தேகமில்லாமல் அமரர் சுஜாதாதான் என்றே அனைவரும் சொல்வார்கள். அதிகமாகக் கதை எழுதியதால் கிடைத்ததல்ல இந்தப் பட்டம். நடிப்புலக சூப்பர் ஸ்டாரான ரஜினி போலவே, மிகச் சிறந்த மனிதராக அவர் வாழ்ந்ததுதான். வெறும் தொழில் திறமை மட்டுமே யாரையும் உச்சத்துக்குக் கொண்டு வருவதில்லை.

நட்சத்திர எழுத்தாளராக மாறிய பின் சுஜாதா எழுதிய மிகச் சிறந்த விஞ்ஞான – அரசியல் நாவல் என் இனிய இயந்திரா. அநேகமாக தமிழில் எழுதப்பட்ட முதல் விஞ்ஞான நாவல்.

தொடர்கதையாக ஒரு ஆண்டுக்கும் மேல் விகடனில் வெளிவந்த இந்த நாவலுக்குக் கிடைத்த வரவேற்பு அனைவரையும் திகைக்க வைத்துவிட்டது.

அதன் பலன், ஊரிலிருக்கிற சிறிய பெரிய எழுத்தாளர்களெல்லாம் ரோபோ கதைகள் என்ற பெயரில் ஏகப்பட்ட கதைகளை எழுதிக் குவித்தனர். மாதாமாதம் பாக்கெட் நாவல்களாக வெளிவந்து ரோபோவை மலிவாக்கத் தொடங்கின.

தமிழ் நாவல் இலக்கியத்தில் பல புரட்சிகளுக்கு முன்னோடி சுஜாதாதான் என்பதால் இதுவும் எதிர்பார்த்த ஒன்றாகவே இருந்தது.

மிகுந்த விறுவிறுப்புடன் சென்றுகொண்டிருந்த கதையை சட்டென்று ஒரு கட்டத்தில் நிறுத்தினார் சுஜாதா, அதன் இரண்டாம் பாகத்தை ஒரு இடைவெளிக்குப் பிறகு தொடங்குவதாக உத்தேசம் என்ற அறிவிப்புடன்.

இரண்டு ஆண்டுகளுக்குப் பிறகு, முற்றிலும் வேறு ஒரு ஸ்டைலில் இரண்டாம் பாகத்தை ஆரம்பித்தார், மீண்டும் ஜீனோ எனும் பெயரில்.

இந்த இரு கதைகளுமே பலருக்கும் நன்கு பரிச்சயமானவைதான். ஆனால் புத்தக வடிவில் படிக்கும் ஆர்வம் குறைந்த ஒரு தலைமுறையுடன்தான் நாம் வசித்துக் கொண்டிருக்கிறோம். எனவே ஆன்லைனில் அந்தக் கதையையோ அதன் சுருக்கத்தையோ சொல்லி, எந்திரன் – தி ரோபோ படத்தின் எதிர்பார்ப்பை எந்த விதத்திலும் குறைக்க விருப்பமில்லை.

ரோபோக்கள் ஆளும் ஒரு யுகத்தில் நடக்கும் அரசியல் சூழ்ச்சிகள், மாற்றங்களை தனக்கே உரிய அங்கத – விஞ்ஞானம் கலந்த நடையில் சுஜாதா எழுதியிருக்கும் அழகே தனி.
தமிழில் கண்ணதாசனுக்குப் பிறகு, அத்தனை வலிமையான புதுமையான நடைக்குச் சொந்தக்காரர் சுஜாதா மட்டுமே.

அதுமட்டுமல்ல... தமிழ் இலக்கிய உலகில் தொடர்கதைகள் துவங்கும் முன் பிரமாண்ட கட் அவுட் வைக்கப்பட்டது மூன்று தருணங்களில்தான். அவை மூன்றுமே சுஜாதாவின் தொடருக்குத்தான் என்பது குறிப்பிடத்தக்கது. அப்படி கட்அவுட், பேனர் என அமர்க்களத்துடன் துவங்கிய கதை இது (இதற்கும் முன் சுஜாதாவின் கனவுத் தொழிற்சாலை, பிரிவோம் சந்திப்போம் நாவல்களுக்கும் கட் அவுட் வைத்தனர்).

20 ஆண்டுகளுக்கு முன்பு இந்த நட்சத்திரக் கதை எழுதப்பட்டதே நமது உச்ச நட்சத்திரத்துக்குத்தான் போலும்!

ரஜினியின் இமேஜ் மற்றும் அவரது ரசிகர்களின் விருப்பங்களைப் புரிந்து கொண்டு சிவாஜி எனும் பிரமாண்ட பொழுது போக்குப் படத்தைத் தந்த ஷங்கரும் சுஜாதாவும் கிட்டத்தட்ட ஒருமாத காலம் உட்கார்ந்து ரஜினிக்காகவே இந்த இரு நாவல்களையும் ஒரு திரைக்கதையாக்கினார்கள். கிட்டத்தட்ட வசனங்கள் முழுமை பெறும் தருவாயில்தான் சுஜாதா நம்மை விட்டுப் பிரிந்தார்.

சுஜாதா உருவாக்கிய என் இனிய இயந்திரா திரைக்கதை இன்னும் சற்று செம்மைப்படுத்தப்பட்டு ஹாலிவுட் தரத்துடன், எந்திரனாக வருகிறது.
அதேபோல, எந்திரன் என்ற இந்த தலைப்பை வைத்ததும் மறைந்த சுஜாதாதான். சிவாஜி திரைப்படத்தின் வெள்ளி விழா மேடையிலேயே இதை அவர் ஒரு யோசனையாக அறிவித்து நினைவிருக்கலாம்.
சுஜாதாவை தன் தந்தை ஸ்தானத்தில் வைத்திருந்த ஷங்கர், அவருக்கு செலுத்தும் மரியாதையாக ரஜினியின் ஒப்புதலுடன் வைத்திருக்கும் தலைப்பு இது.
தமிழக அரசும் இந்தத் தலைப்புக்கு ஒப்புதல் வழங்கியிருக்கிறது.

அனைவர் மனதுக்கும் இனிய எந்திரனாக அமையட்டும் இந்தப் படம்!

இயந்திரன் ஆனது ரோபோ!

சூப்பர் ஸ்டார் ரஜினி அடுத்து ஷங்கரின் நடிக்கவிருந்த ரோபோபடத்தின் பெயர் இயந்திரன் - தி ரோபோ என மாற்றப்பட்டுள்ளது.

இதோ அதுகுறித்த அதிகாரப்பூர்வ செய்தி:

இந்தியாவின் ஷோமேன் எனப் புகழப்படும் ஷங்கரின் இயக்கத்தில் சூப்பர் ஸ்டார் ரஜினி நடிக்கும் புதிய படமான ரோபோவுக்கு, இயந்திரன் – தி ரோபோ என்று பெயர் சூட்டப்பட்டுள்ளது.

சிவாஜிக்கு அடுத்து ரஜினிகாந்த்தும் ஷங்கரும் இணைந்து மீண்டும் ஒரு படம் செய்யப் போவதாக அறிவித்தனர். அதற்கு ரோபோ என்று தலைப்பும் சூட்டினர். மறைந்த எழுத்தாளர் சுஜாதாவின் என் இனிய இயந்திரா மற்றும் மீண்டும் ஜீனோ ஆகிய நாவல்களின் அடிப்படையில் உருவாக்கப்படும், தமிழின் முதல் பிரமாண்ட விஞ்ஞானப் படம் இது.

இந்தியாவிலேயே அதிக பட்ஜெட்டில் (சுமார் ரூ.140 கோடி) அய்ங்கரன் பிலிம்ஸ் இன்டர்நேஷனல் உருவாக்கும் இந்தப் படத்துக்கு பொருத்தமான தமிழ் தலைப்பு சூட்டப்படும் என ரஜினி முன்பு அறிவித்திருந்தார்.

தமிழில் பெயர் வைத்தால் கிடைக்கும் வரிச் சலுகைக்காக இந்தப் பெயர் மாற்றம் இல்லை என்றும், தமிழில் தலைப்பு வைக்க வேண்டும் என தமிழக அரசின் விருப்பத்தை மதிக்கும் வகையில் இப் பெயர் மாற்றம் செய்யப்படுவதாகவும் ரஜினி ஏற்கெனவே அறிவித்தது குறிப்பிடத்தக்கது.

இயந்திரா என்ற பெயர் முதலில் பரிசீலிக்கப்பட்டது. பின்னர் இயந்திரன் என மாற்றப்பட்டது. ஆனால் இதில் ரஜினிக்கு அவ்வளவாக திருப்தி இல்லையாம்.
கடைசியில் அவரது யோசனைப்படி இயந்திரன் – தி ரோபோ என இந்தப் படத்துக்குப் பெயர் சூட்டப்பட்டுள்ளது.

ஏற்கெனவே 3 போட்டோ செஷன்கள் முடிந்து விட்டன. கடந்த வாரம் அமெரிக்காவில் ஹாலிவுட் ஸ்டுடியோவில் ஒரு போட்டோ ஷூட் நடத்தப்பட்டது.
இந்நிலையில் நாளை மறுதினம் முழு வீச்சில் பிரேஸ்ல் நாட்டில் படப்பிடிப்புத் துவங்குகிறது.

ஏற்கெனவே ரோபோ படப்பிடிப்புக்காக ஷங்கருடைய ஒரு குழு பிரேஸிலில் முகாமிட்டுள்ளது.
ரஜினிகாந்த், இயக்குநர் ஷங்கர் உள்ளிட்ட குழுவினர் நாளை புறப்படுகின்றனர். படத்தின் நாயகி ஐஸ்வர்யா ராய் நேராக பிரேஸிலுக்கு 7-ம் தேதி வந்து விடுவார் எனக் கூறப்படுகிறது.

நன்றி- தட்ஸ்தமிழ், எஸ்சினிமா